«عكس أحكامهم القديمة».. شريف إكرامي يفتح النار على تصريحات شوبير

وجه شريف إكرامي، حارس مرمى الفريق الكروي الأول بنادي بيراميدز، رسالة غامضة، بالتزامن من تصريحات الإعلامي أحمد شوبير، عن أنباء انتقال محمد شريف، لاعب الخليج السعودي والأهلي السابق، إلى نادي الزمالك في موسم الانتقالات الصيفية المقبلة.

ونشر إكرامي عبر حسابه الرسمي على موقع التواصل الاجتماعي «إكس» (تويتر سابقا): «نفس القرار ممكن يتقال عليه خيانة من لاعب واحتراف من لاعب تاني مش علشان التصرف مختلف، لكن علشان القميص اختلف، الأحكام بقت حسب المزاج والمصلحة، مش المبدأ».

وأضاف: «تسمع نفس الأشخاص بيقولوا عكس أحكامهم القديمة والتبرير بقى فن بيتفصّل على مقاس الانتماء مش على مقاس الحقيقة. الإدارات بتوجه، والإعلام بيغذي العاطفة، والجمهور في النُص ضحية الجميع».

وتابع حارس بيراميدز: «الاحتراف مش كلمة تتقال حسب المصلحة ولا تتشال وقت الغضب، ده الواقع وأساس اللعبة. زي ما النادي حر، اللاعب كمان حر، قراره صح أو غلط مش مهم لان مش ده الموضوع، الأهم أن الاختلاف في القرار لا عمره كان خيانة ولا قلة أصل ولا ليه علاقة بضعف أو قوة الانتماء».

وأتم شريف إكرامي: «الموضوع مش قرارات اللاعبين أو الأندية. اللي محتاج يتغير هو النظرة، طريقة التفكير، والأحكام على القرارات نفسها».

وكان شوبير قد أكد خلال برنامجه الإذاعي «مع شوبير» على إذاعة «ONsport FM»: «ناس بعتتلي رسايل بتقولي يا كابتن قول لمحمد شريف ميروحش الزمالك؟، ولكن ليه ميروحش الزمالك هو في حد في الأهلي كلمه!».

وأضاف: «الزمالك فريق ونادي كبير وشريف مؤكد هيتألق معاه في حال الانتقال إليه».

وأردف: «محمد شريف منتظر قرار النادي الأهلي حتى الآن، بس لو اختار الزمالك هيبقي حقه. وفكرة لما قال معايا الجنيه في الأهلي بعشرين برة كانت في زمن غير الزمن».